Lamhokke word al vir baie jare gebruik, maar meer in noodgevalle, vir die beskerming van diere teen uiterste weerstoestande soos koue en sneeu. Baie boere het altyd onderdak ‘n paar hokkies vir sulke gevalle.
Weens verskeie probleme in Suid-Afrika soos diefstal en roofdiere, word daar nou groot druk op die finansiële lewensvatbaarheid van veeboerdery geplaas en maak boere planne om elke lam wat gebore word te speen.
Die meeste lamvrektes vind plaas gedurende die eerste drie dae na geboorte, aangesien die lam maklike prooi vir roofdiere is asook verskeie ander redes.
Onbeperkte suip gedurende die eerste dag na geboorte, veral die eerste ses uur, is van kritieke belang vir die lam om sy ma te leer ken. Lammers wat verhinder is om die eerste ses uur na geboorte te suip, was nie in staat om hulle moeders 24 uur na geboorte uit te ken nie omdat die bindingsproses nog nie plaasgevind het nie (Goursaud & Nowak, 1999) met gevolglike hoë lamvrektes. Indien die lam nie binne die eerste drie uur na geboorte suip nie, neem sy speensoekaktiwiteit af asook die ooi se belangstelling in die lam (Cottle, 1987 & Holst, 1997).
Ile de France is bekend vir sy meerlinge en daarom vereis dit spesiale toesig en bestuur. Meerlinglammers speel ‘n uiters belangrike rol in die winsgewendheid van skaapboerdery omdat hulle die reproduksietempo van die ooikudde verhoog.
Dit is belangrik om te besef dat lamhokke nie ‘n kitsoplossing vir meer lammers is, of om slegte moeders te reabiliteer nie, maar dis slegs ‘n hulpmiddel tydens lamtyd. Probleme weens wanbestuur word ook nie opgelos met lamhokke nie. Die belangrikste rede hoekom ooie lammers weggooi, is omdat hulle nie genoeg biesmelk met geboorte van die lam het nie, weens ‘n tekort aan deurvloeiproteïen. As jy vir jou ooie sorg, sal hulle vir die lammers sorg…geen skaapras is bestand teen wanbestuur nie
Lamhokke vergemaklik bestuur en toesig gedurende lamtyd en probleemgevalle kan dadelik aandag kry wat lamoorlewing bevorder. Lamhokke bevorder ook akkurate rekordhouding, wat op sy beurt weer teelvordering versnel. Daar is geen nagevolge dat mens moedereienskappe op die ooi verloor, of dat slegte moeders kunsmatig goeie moeders gemaak word nie. Dit is makliker om ‘n swak moeder in die lamhok raak te sien en haar dadelik uit te skot as waar ‘n ooi in die veld sou lam.
Sinkroniseer ooie wat in die lamhokke moet lam, om tyd in die lamhok te verkort en voedingskoste en arbeid te bespaar. Ooie kan kort voor lam nader aan die lamhokke gebring word, en sodra die eerste ooi lam, kan al die ooie in die lamhokke geplaas word.